مساجلة فى فن الواو لكوكبة من شعراء رابطة شعراء العامية

مساجلة فى فن الواو

لكوكبة من شعراء رابطة شعراء العامية

-------------------------------
( 1 ) عادل صابر

أنا واوى خضَّر مع السنط
ونضغت شوكُه وعاقـــوله
ولما اقول تلزموا الصــنط
وتوطّــــوا للى ع اقــوله !!
----------------------------------
( 2 ) محمد فتحى السيد

انا واوى يـشـفـى الـعـليـل
و تطيب حشاه و مشاعـره
و يـقـولـوا فـيـه الـمـواويـل
ويتوهوا فى حسن شعـره
---------------------------------
( 3 ) عادل صابر

م النخـــــل قـــولى حلبته
مقرَش و مر ورطـــــــــايـب
كيف سيع ضارى ف حلبته
حصّــــاد و الـبـــــَر طـايـب !!
----------------------------------
( 4 ) محمد عطا

انا واوى تـحكى كــــلام
و تقول كمان ع الحقايق
يا ريت نبطـل خـــصــام
و نكونوا اخوة و شقايق
---------------------------------
( 5 ) عادل صابر

الــــــــــواو للجـــرح طيّاب
هــــو الدوا و الـــــمساكن
كيف نخل واقف فى طيّاب
وف غـيـر ديـارنا مـاســاكن
---------------------------------
( 6 ) محمد عطا

الـواو دا فن و عــلام
و انا بفـك الـــــخــط
يمكن بقـــول كــلام
مفهوم و ماهش رط
-------------------------------
( 7 ) عاطف سليمان

الواو في القلب ساكن
و الآه تمـزق ضلــوعي
بعدك رفـضت الأمــاكن
و العقل رافض رجوعي
------------------------------
( 8 ) محمد عطا

بلح العلالى لو احـمر
تبقى الحـــــلاوه فيه
وغزالى لــو يتمخطـر
أشتاق واتوه ف عنيه
------------------------------
( 9 ) عاطف سليمان

النخل لـــو عــــــالي
ميسلمش من الطوب
و انت هــواك غـــالي
و الـرك ع الــمـكـتـوب
-------------------------------
( 10 ) محمد عطا

غـزة ملت م الصــــراخ
غــزة ملت م العــــويل
شكل الــعـــــروبـة باخ
و العـــربى أصبح ذليل
---------------------------------
( 11 ) محمد فتحى السيد

انا واوى يسحر عـقـول
محكم كلامه وجناسه
يـعـجب ملــوك الـقـول
و يطيب لأهله و ناسه
---------------------------------
( 12 ) رفعت أبو العلا

الواو مولود ف الجـنوب
و لابس جلابيّه و عمّه
و لمّا ناديته ج نـــــوب
و نده ع الـخـلـق عمّه
-----------------------------------
( 13 ) محمد فتحى السيد

الواو بنبدع فى قـوله
الــكـل يـفـهـم متعانا
الواعى يعرف أصـوله
والأمى عمره ما عانا
----------------------------------
( 14 ) رفعت أبو العلا

الــــواو حَدِيتُه زِينْ
يِعـجِبْ وِلاد الأمَاره
يفَرّج قَــلب الحَزِين
ويفْتَح بِيْبَان الإمَاره
---------------------------------
( 15 ) محمد فتحى السيد

الــواو صعيدى الأصـول
فى بحرى طالع طـرحه
تلقاه ف حروفى يصول
و اجمل مربع طـــارحه
----------------------------------
( 16 ) رفعت أبو العلا

انا واوي سحر و عجب
تعالــــوا دوقوا شترابه
و اللي يبيع الـــدهـب
م يهمهــــــوش تـرابه
----------------------------------
( 17 ) حماده صلاح الشافعى

و نا واوي تايها وبعيده
و حـــــروفها متنطوره
و اللي بقتتوله بعيده
و الخطوه راجعه لوره