فاطمة المرسي
شيزوفرينيا
لا هيَّا هيلين
ولا طرواده ف القصة
ف ليه دايما عينيك بصَّه
على الأوهام ؟!
وليه بتنام ..
وتتداري في حلم عبيط
تغازل طيف ماهوش موجود
وترسم للخيال ملكوت
وألف حكايه وحكاية
شريط بيمُر قدامك
صور باهتة
لا مسموعه ولا صامتة
يادوب تشويش
وسايب نظرتك بشويش
بتتسنِّد على المشاوير
وتنسج م الخيال روايات
تعيش فيها كما الواقع
ياراجع من خيال هربان
مافيش أبطال بدون بطولات
وإنت بتدخل الجولات
وراكب فوق حصان أعمى
لا شايف ياخد الخطوة
ولا حتى اللجام ف إيديك
وليه بعنيك ..
بتجري لآخر المشوار
وترفع كاس ؟
وليه بتلوم عيون الناس
فى يوم ما بتلمح الشفقة
بيرموها عليك أوجاع
وليه حاسس زمانك ضاع
ما دام من أول القصة
بتتدارى في حلم عبيط
وترسم للخيال ملكوت
وتهرب حتى من ذاتك
وعايش حيره فوق حيرة
كأن الحيره لزْماتك
وكل اللي اترسم زادك
( شيزوفرينيا )
.......................
فاطمة المرسي
ديوان / ليه وجودك مشكلة ؟
ليست هناك تعليقات:
إرسال تعليق