من رباعيات الشاعرة / فاطمة المرسي

قبضوا عليك يا نيل وتهمتك مصري
أحباش ولاد أحباش والعار لِنا حَصري
بتجري في دمِّنا وعملنا مش شايفين
خطفوك فى عز النهار لمَّا اتعمى بصري

***
بنوا السدود ع السما .. إشرب يا نيل م البحر
يلا انوي فرض العطش وادعي ف صلاة العصر
موسم جفاف العقول رعرع وفاض بالطرح
إشحت يا غيط ضحكتك من حفارين القبر

***
بنوا السدود ع السما .. إشرب يانيل م البحر
واروي السنابل هِنا وِسْط الغيطان بالمُر
واما الشادوف ينزوي ويقول مانيش عطشان
ما تاخدش ف الحسبان .. دا رد فعل القهر

***
بنوا السدود ع السما .. إشرب يانيل م البحر
واياك تقول مَظلمة .. للي ابتلوا بالسحر
أصل النجاشي خلاص كسر الصليب يانيل
ولا خدش بالترتيل ولا حس نور الفجر
......................................................
فاطمة المرسي
ديوان رباعيات بالبلدي