دم الشهيد ف مصر وف غزه..........سرقة الحريه ف اليمن وف سوريا...........اغتيال بكره ف الوطن العربى
...............ليل داخلى
الليل وطن
بالشياطين انسكن
افتح قميصك ياشّريف
لملم الجرح المخيف
وابلعه
!ما افظعه
!ما اوجعه
كل العيال بيسبعوا
وبيرضعوا
دم الكفن
الليل وطن
قمره اتخنق
بكحلة سواد
اقطف ياواد
دمعتك
وازرعها ف طموحك
واروى بآنين روحك
يطرح ميعاد بوحك
تطرح غضب
يطرح وطن
تطرح عرب
غير العرب
المنقوعين
جوه العطن
الليل وطن
الليل ماهوش ستّار
تجار سمك ميت
انما الصياد حمار
عبا الشبك ديناميت
وقرر الانتحار
اصطاد الصغار العرى
الفطسانين م الهم
المقطوعين م الجرى
!وسماه انتصار
اى انتصار؟
يامحاربين الصغار
وع العيال شطار
يامطوقين اليتامى
والوطن جوه الحصار
يابواقى الاستعمار
اى انتصار ؟
وايها بطولة؟
على عيله بترضع
من ام مقتوله
ومولود بيتفرقع
فى بصته الاولى
جرحى شايلين جرحى
قتلى ماتوا بعد
مااتمصوا م الغوله
واتحاصروا ليل نهار
اى انتصار؟
الليل وطن
والولد سايح ف دمه
ع الاسفلت
ماكنش قاصد يموت
ومكانش يعرف كمان
ان السلم بلا معنى
وان الوطن باعنا
وان الغدر المسخوط
ف بطن الحوت بيجمعنا
الليل وطن
ياولدى
جيت احضنك
غرقنى دمك
لا طولت انا اهننك
على صدرى ولا اضمك
وفردت حجرى
اجرى ياواد اجرى
تعالى حضن امك
وندهت لاخواتك
لابوك وزملاتك
لجلن سوا نلمك
الكوتشى
الكراس
المحاضرة
ملحقش
يقولها الاستاذ
خدك الغماز
قلمك الرصاص
الجف
دمك اللى شف
صورتك على الازاز
قلبك تفاحه نطت
عضمك ازاز ف ازاز
خلوك ياضنايا فحم
كوم هدوم بلحم
جريت عشان اضمك
مالحقت ياضنايا
الا بقع دمك
ناشفه ع الاسفلت
الليل وطن
و يتفاوضوا
و يتزللوا برضو
و يدلدلوا ويمضوا
بغداد فى بنغازى
الاقصى فى حجازى
الغازى والانتهازى
اقضوا على نصه
على ربعه
على سدسه
بيروته على قدسه
لو انتوا بتحسوا
تسيبوها لغوازى
يمكن تصون عرضه
واحنا نقول ياوطن
باى باى
ونهتف لكم برضوا
اقولكو اتفاوضوا
وانا ف الاوضه الضلمه
بجاهد بالشعارات
اكتب واكتب
اشتم واشجب
والليل بيمسح
لى خطاوى
الشارع المهزوم زىّ
ماهوش ناوى
يفتح الشبابيك
يرمى الضيا عندى
يادنيا بتعاندى
والليل وطن
هناك تعليق واحد:
من أقرب القصايد لقلبي بجبها جدا وشايف انها من القصايد المهمة للشاعرة الجميلة اللي بجد فخور بيها جدا
ناظم نور الدين
إرسال تعليق