شركة صرافه …
-------------------------------
كالعاده
و لا كرافِتَّه .. و لا ألوان
تي شيرت أحمَر سادَه
فوق بنطلون الچينز
يمكن عليه بقعة طحينه ..
تنزّ
من سندوتش قديم ..
زمان العِزّ !
Tide صَمَدِتْ ل
مِن سنين الصياعَه
أيَّام ما كان للناس
وشوش بحَبّ شباب
و ضِحْك غاب عنها ..
ما ساب عنوان
_________________________________
سفّاح جديد
مولود في وول ستريت
إسمُه الدُّولار ..
لُه صيت و كِلمَه مُطَاعَه
قاعد ورا مكتب في شركة صرافه
متشاف ..
و مش متشاف
بيشجّع الأهلي ...
و يركَب زرافَه
وقت الفراغ من قتل كلمة بحبّك
و نَدَى على المونوكير
و فوق شِفِّتين
في زحمة الزّاويَه
بعد ( العَلَف )
بالميكروباص .. و التُّكتُك
_________________________________
أنا اللي عارف هلوسة ( لوتريك )
بيبُصّ م الشبابيك
على المطر في پاريس
مَطَر بريحة ... و صوت
و اشاركُه توليع السيجاره
..و باضحَكْ
لصدر يلعب إكروبات ..
و يفوت
مِن سلك شايك في العيون يتصَعلَك
يمكن برستِتيوت
___________________
واقف على ناصية ميدان
و حارات
في واحده منها إتوَلَد ( عَرَفات )
إسم الميدان كان : ( السّكاكيني )
و اسمي الجديد _ زيّ الجميع _
( السُّكات )
لو مَرَّه حبّيت في الضّلام تناديني
__________________________
علاء عبد الرحمن
قطار ٩١٦ الإسكندرية / القاهرة
٢.٣٠ ظهرا
ليست هناك تعليقات:
إرسال تعليق