آخر حلم
نازفة الشوارع بالبشر مسافات
و لا حد عارف سكته فيها
يا عمر عدى بالأمانى و فات
و اتاريها طلعت ..
زى بعضيها
و انا كنت اجدع صبى ..
لكنى حتما .. غبى
شايل كأنى النبى
وحى القصايد نور
و فاكرها قال .. دستور
و باخطى للأحلام فى موكب من سراب
لأ و الغريبة قوى ..
كان ينفتح لى الباب :
ادخل يا شاعر باليمين
و اكتب عن العشاق يسار
و اكتب عن العشاق يمين
من غير ما تحلف ١٠٠ يمين
باين عليك .. كدااااب
أصل الحكاية مش غناوى ع الرباب
و لا هىّ حدوتة رواها كتاب
ماتبيعش نفسك فى مزاد محسوم
دا المهر غالى قوى ..
و انت يا واد .. معدوم !!!
اقعد هناااااااك
عند آاااااااخر حلم
و الضم حكاوى ذكرياتك فيلم
و ارسم حبيبتك عبلة أو ليلى
مانتاش ح تصبح عنترة أو قيس
فى عيونها لو .. ليلة
ضفّر غناوى العندليب و منير
جمّع قصايد شوقى ويا نزار
واوصل شفايف نور مع خد صافى حرير
جايز تلاقى فى النهاية نهار !!!
جايز تلاقى فى النهاية نهار !!!
ليست هناك تعليقات:
إرسال تعليق