----------------------------
عبد العظيم مسعود ؟؟ تعيش انتَ ..
زمانُه ف تربِتُه عفريت و عضم
تسألني ليه عنُّه ..
مين يسأل الأموات عن الأموات يا عمّ ؟
إمشي ببساطه كأي واحد ما اعرفوش
كأي روح متحضَّره بالغصب .. شِمَّ
الذكريات على باب قديم
الريحه أصدق من تاريخ مكتوب برجل الحاكمين
إنسيكلوبيديا الفراغ ..
و بشاعة الدبَّاغ بيعمل جوز جزم
من جوز بشر بلحم و دمّ
عبد العظيم مسعود ؟
أخينا الثورجي
أبو رجل واحده و عُكَّازين
و عين قزاز
بركات دخولُه المعتقل
في خروجُه
خد تاكسي و قالُّه : بينا دوغري ع البوغاز
قعد شهور في ( سلطنه ) يمكن ( عُمان )
و رحَّلوه أول ما زارُه في حلم ماركس ..
ع البلاك ليست ـ الغبي ـ محروق بجاز
في حدّ يحلم في الزمان دا بالفلاسفه
أو يعدي جنب صورتهم و ف إديه ( الجواز )
رجع .. يكلّم نفسُه في تراب المرايه ..
و الملاذ
كام اسطوانه من موسيقى مكعبله
يسمع لهم
من بعد نصّ الليل
في أودتُه فوق سطوح بيت (ابراهيم الباز)
العربجي ؟
أيوه ..
و فضل كتير كده ؟
لحد ما السرطان ناداه
ما قالشي : بِمّ !
لا نفع معاه كيماوي
و لا إشعاع جهاز
و الحمد لله
لم يكون لُه ولاد
يدوقوا - بعد موتُه - اليُتم
ليست هناك تعليقات:
إرسال تعليق