" واحد وطن .. ع الريق "
------------------------------
صباح ومسا الأفكار
المحشية فـ المُمبار
للقاعدين على الكراسي
فـ قهوة المزانيق
وبيرسموا الأحلام على الطقاطيق
والحلم ساده
رايح جاي فـ المشاريب
طالع على الحيط
يكتب نفسه عـ الحساب ..
تشربوا إيه ؟
واحد فقر زيادة
وواحد عِلْم سادة
وصحة عـ الريحة
وجهل مظبوط
وحُب فـ الخمسينة
وبت بلاستيك قالعة فـ الفاترينة
بيريِّل عليها الواد
...
أيوه جااااااااااااااي
وعدنك عيشة قَصْ
وقرفة
ومَزَّة خس
واتنين شاي ميزة
لل افندي والمدمازيزا
واتنين جوزة
وحط فـ اللبن موزة
...
ورنيش
ورنيش
...
ايوه جااااااااي
...
ياواد ياماشة
أيوه يامعلم
فين حساب تاريخ امبارح ؟
دا كله ممسوح
معلش يامعلم
بس انا فاكر
كان 15 طبق مهلبية
وعشرة جوزة محشية
وخمسين طلب ينسون
و3 نسوان لـ عشرين زبون
طب شغل الراديو ع النشرة
وقول لـ بنت الحافية
ماتجيش هنا تاني
وهاتلي دفتر البَفْرَه
وافتحلي موقع القهوة
عـ الفيس
...
ورنيش ورنيش
عندك 30 رسالة
و70 طلب صداقة
ومعجبين
وكتير معلقين
تدوم القهوة يامعلم يا ابو الأفكار
ويكتر المُمبار
...
أيوه جاااااااااااي
...
مالك يااستاذ
راسك ف كراسك
من غير ولا كلمة
شارب ف أنفاسك
طب قوللى تطلب إيه ؟
ياماشة غيَّر محطة الراديو
وانساني
وسيبني اشد فـ وداني
يمكن تدخل أغاني غير الأغاني
يمكن المزانيق
يطلبوا وطن عـ الريق
...
ورنيش ورنيش
...
أيوه جاااااااااااااااااي
ليست هناك تعليقات:
إرسال تعليق