رمضان مخصّش مسلمين
رمضان ف مصر
ملوش علاقه ب.اي دين
أنا فاكر وإحنا صغيرين
أنا كنت بستنى الأدان
علشان نوّلع كام صاروخ
ونجري ونسد الودان
رمضان زمان
كان له هيبه ف المكان
كنا نهرب م الدروس
نجيب غِره ونجيب ورق
ّنلّم لجل نجيب فانوس
والخناق
مين فينا أوّلى يعلقه
شارعنا كان
زي العروسه المؤمنه
واحنا اتعاهدنا نزوّقه..ونروّقه
لجل ما يخش العريس
رمضان زمان
إيام ونيس
ومراته مايسه
لو مهما برده شفتها بتضحك ومايصه
مبروحش وأجرى واقول هعاكس
رمضان وضي إيمانه عاكس
ع القلوب المشتاقين يدوقوا رحمة ربنا
أنا كنت متربي هنا
وسط الغلابه الطيبين
وسط الايدين الشقيانين
مستنظرين اخر النهار
وسط العيال المهوسين
ب. رشيده وحسونه وبكار
وسط البيوت المفتوحين
ل.اي عابر ع الفطار
رمضان كريم
رمضان بيفرش خير ونور
رمضان ما ينفعلوش رچيم
كان كله ياكل ع السحور
رمضان مخصش مسلمين
ويارب تبقوا كل عام
ب.ألف صحه وطيبين
Kerollos Saeid Mikhael
ليست هناك تعليقات:
إرسال تعليق