زمان لما انت حبيتني.. للشاعرة سلمي فؤاد

 زمان لما انت حبيتني

مخليتش الكلام يحتار
مسيبتش لحظه هتفوتني
مشيتني لآخر المشوار
شفايفك بالحنان تطبع
شهادة حب فوق خدى
وحضنى بين ضلوعك
غيم بيطرح ورد ويندى
عيونك م الحنان تغفى
وعمرك فالهنا يرتاح
وبين كفيك حدودى أدفى
من شمسك ف كل صباح
وترسم من هواك نهرين
يصبوا الشوق ف شراييني
اكونلك فالهوى درويش
وحبك وجهتي وديني
ويملك كل شئ بوحك
سكوتك فيا يحييني
اميره وسكنتي روحك
وقربك نور يخليني
ادوق من قلبك السكران
خمور العشق واترجاك
تكون الضيف ورا البيبان
وشمس حياتي ع الشباك
وادوقك فاكهة م الجنه
واسيبك فيا تستني
للحن العمر يكمل بيك
الون جسمي بيك حنه
وتنده فيا ع المعني
فتوصل دايرتي بإيديك
تخيم فوق حدود الكون
علي خصري
ويوهبلي حنانك نور
ضيا بصري
تسميني علي اسمك
وترسمني الوطن كله
وتسلب روحي من لمسك
وهمسك قلبي بيقوله
متتركنيش علي الطرقات
ادور فيك علي نفسي
بلاش ترميني للدمعات
تظن القسوة بتقسي
بلاش ترتاح لتوديعي
وفكرك تلقي حضن جديد
يفتح وردي ف ربيعي
وبعدى هتبقي حد وحيد