"شبرين ونص " للشاعر أسامة الخياط

شبرين ونص
.........................
شبرين ونص
على مايلمس كف الوليد
خدين أمه
شبرين ونص
على مايلاقى حضن
يحميه ويضمه
وانا فى النص
حيران مابين
كف الولد
وبين أمه
...........
حيران وعايش فى المزاد
لا مره حلمى نقص
ولا مره واحده زاد
بابكى على اللى راح
ولا على اللى عاد
عيل وتايه أنا
مابين شوية أسئله
انا يامّا قولى مين
ولا اتولدت فين
حلمى اللى ضاع
لحظة ضياع
وتهت ياما مابين
اللى أشترى
واللى باع
شبرين ونص
............................
مابين دموع عينك
وبين كفى
مشوارى مهما طال
عدوده بينك وبينى
يامّايا ماتكفى
لمى الدموع لمى
همك طوى همى
ومهما حضنك يلم
انا مش ببيع دمى
شبرين ونص
..........................
ياليل وابكى فيك
حلم الولاد حواليك
انا ايه يقضينى
غير لقمه تشبعنى
والقى العيال ف عنيك
ضمينى وعيالك
سفرك وترحالك
ده انا حالى
من حالك
همك مع همى
ضمى كف الوليد
ضمينى يا أمى
شبرين ونص

الخياط