قصايدالبنت... للشاعر / حاتم حواس

قصايدالبنت... للشاعر / حاتم حواس

قصايدالبنت

1

افتح خطاك للضحك
هتشم ريحة كلام البنت
مستنياك ف الخوف
رافعة إيديها
للرجوع مواويل
منتورة من صرة غناك
وبترتعش م الحر
نيل كاسر طريق رحلة
ومخبّى جوّاه عيونك
عصفورة ترقص عالشجر
والولد مش عارف يصيد
متسنّد على العكاز
وبيقشّ فى الكوتشينه
فتحت عنيها كشفت سرقته
مجروح بينزف سنينه
وطن مش لاقى عيل صغير
يشيله من عالارض.

2

البنت إللى بتسقى
شجر الورد في الجنه
ويتكتب أحلى قصائد شعر
وبترجع تنقشها بقرطاس الحنه
والدمع إللى بيجرى على نهر الخمر
وبتسكرنى
مش عارف ليه
دائماً البسها الفستان وأنا نايم
باحلم بآيات الذكر وأغنيه لفيروز
وسرادق قدام بيتنا
مفتوح للكل
-------------------
البنت اللى بيزعل منها الصبح
وبيحكيلى انها رفعت قصرية ورد
وقعدت على عتبة حلمى
تغنى أغنيه سخيفه وتقول انها زعلانة
------------------
البنت اللي بتركب مركب نص شراعى
ومبتعرفش تعوم
وبتغرق فى العشق
اناهارفع عنها آياتى وهاسيبها وحيدة
تغرق ف الحزن!

3

البنت اللى. تفوت كل كلام الشعر
وتمسك ف الكلمة الواقعة من السطر
وتقلبها حروف وتشخبط على باقى الورقة
وترجّعنى تانى م الأول نقطة ومن آخر السطر

4

الضحكة إلى بتسكن روحك
وبتنزل على قلبى زى الشلال
انا هسكن فيها
وهكلمها عنى وعنك
واراقبها بهدهد
يفتح صفحة قلبك
ويجيب لى الاخبار
وأرصد
من ورا شيش شباكى المفتوح
على صوت بينادى للشمس
المتسرسبه جوانا

5

البنت
اللي بتسرق آآآآآه
من عند الولد المركون ع السّور
مستنّى تعدّى ويبصبص ليها
وبيبعد جسمه عن النار
البنت العاشقة
مش ممكن تتراجع
عن ابن الجنة
المجنون بعبايتها السودا
المسنودة بكباسين
والجسم المرمر هيبان
لو وقعت ع الارض
وكمان هيبان لينا لون حمالة الصدر
وتبان العورة الكامنة
ف الكلب المسعور للضرب
وأنا واقف اتفرج ع البنت
والولد الساكن ف الجنة
وباحاول اسجن عقل الكلب.

6

الولد المسجون فى كلامه الفارغ
ولع للبنت الواقفه بتستناه
ف الغيمه المدفوع بريح
مسكونة بحرية وطنه
واقف يتفرج من كذبه
عالبنت إلى بتهرب منه
وبتسكن جوانا
نرميها للولد المفتون بوجاهته
ونضارة الشمس
يلف معاها شويه
ويرجعهالنا
...........................
البنت البكر
نصحى من النوم تلاقيها
واقفة ولابسة فيونكة
وعاملة ضفيرة لحدّ الأرض
بنلملمها
ونزرعها
ولما تفرّع
نشغل حواليها التاج
ونغنيلها!
تيرا را را را را