الحب بيبان ع الوشوش... قصيدة للشاعرة / مني حواس

الحب بيبان ع الوشوش... قصيدة للشاعرة / مني حواس

(1)
صوتك لقلبي كان طريق
ومشيت لآخره وصلتلك
وآمنتلك......
فأذنتلك
تسكن ربوعى وجنّتي
وكنّا نسهر بالساعات
نحكي ف حاجات
ونقلِّب الجاي ع اللي فات
ولمّا نتعب م الكلام
ننام ونسمع للسكون
...............

(2)
وقت امّا اكون
حاسّاك بجد وحشتني
بيضمّني....
صوتك كأنّه كمان وَتر
يغويني شيطان الهوى
فاتغطّي بدموع الشجر
أنزف هواك وانا بارتجف
من رعشتي والبرد
استنّى نفحة من دفاك
ومحبّتك
ألقاك بتقفل جنّتك
فبَعتّلك
روحي اللي عشقت كلمتك
بعترتها ع الأرض!!!!!
................
(3)
الضعف قدّام الحبايب
مش غلط
بس اللي يوجع
إنّهم ميقدّروش
وميعرفوش
إنّك بتحبس دمعتك
جوّا العيون
وقت امّا تحجب رؤيتك
عن قلبهم
فمبيبانوش.....
الحب ضعف
لمّا هُمّا ميفهموش
إنّك بتعشق ضلّهم
فَتداري وشِّك عنّهم
ّتدفن عيونك بالحيا
الحب بيبان ع الوشوش
::
منى حواس
" من وحي اللحظة"