البُرتقان
البُرتقان
من ع الشجر واقع
قبل الأوان \ واقع
كان لسه بدري أوي يا بنات
على طرح الشجر
كان لسه بدري أوي
على وقعتُه ف الأرض
مل الشجر و هوى
و لَّا الهوا حدفُه
و لَّا مع الجثث الكتيره اللي التُراب بيبُخها
قلقُه الصريخ و انتفض
و نزل بسرعه يحضن الجثمان
و يشَيَّع المشهد ؟!
أنا زعلان منك ... للشاعر / أحمد الخدرجي
الأحد، مايو 11، 2014
أنا زعلان و مخاصمك جدا / و مفيش بيننا كلام ع الخاص و لا ف التليفون / و لا عايزك برساله تصالحي / و لا تبعتي غنوه ل " فيروز " / و لا حتى قصيده ل " درويش " / أنا زعلان منك و الله / و قلتلك امبارح على فكره / خليكي الأيام دي ف ضلي / قلبك يا حبيبتي اللي فاضلي / و من ساعة ما قفلنا امبارح و لدلوقتي / مفيش و لا حتى صباح الخير ! / طب ليه بالشكل دا بتضلي ؟ / ليه بتخلي / الحواديت البكر تعجز / و تكشر و الدنيا تبوز / و انا و انتي بالعافيه امبارح /لازقين الضحكه ف شفايفها / أنا زعلان منك و الله / بس بحبك / باعشق شكل النور ف عينيكي / باعشق لياليكي و حواديتك / يخرب بيتك / بيت الحب و بيت أيامه السودا يا بت تعبت / و كل ما اقول مش راجع تاني / خلاص مش حاقدر / روحي بتكتب بعث جديد لعيونك فيا / و احبك أكترhttp://adab3.blogspot.com/search?q=%D8%A3%D8%AD%D9%85%D8%AF+%D8%A7%D9%84%D8%AE%D8%AF%D8%B1%D8%AC%D9%8A
ما تلبسيش روحي كده.. قصيدة للشاعر /أحمد الخدرجي
السبت، يوليو 05، 2014
ما تلبسيش روحي كده
على فكره ممكن تخرجي مني ببساطه أوي
قومي افتحي الدواليب
و لمي فساتينِك
سيبي البلوزه الحمرا
علبال ما اشيل منها آثار صوابعي
و اخيطلك زرار انقطع
و انتي بتشدي نفسك مني ف هزارنا الأخير
و ضحكتك متشعلقه ف النجفه
و لسه لحد دلوقتي مش عارفه ترجعلك
إتسحبي براحه
و انا مش حاخد بالي من خطواتك
ممكن اعمل نفسي نايم
أو قلبي يشبط ف مزيكا بحبها
فادخل ف غيبوبه لحد ما تعدي
و ممكن استسلم لحالة سُكر مثلا
مع صوت " ياسين التهامي "
أو انشغل بقراية قصيده طويله
أي قصيده يعني
ها ... إتسحبي يلا
مبحبش لحظات الوداع
لو حتى مش حنسلم على بعض
عدي من 1 ل 10
و........
و ادخلي أكتر ف حضني
.....................
قصيدة جديدة للشاعر أحمد الخدرجي
الخميس، أغسطس 07، 2014
يومها ...
مكانش مقرر إنُه يسيب البيت
نضارتُه اللي بيخرج بيها على السراحه
جزمتُه تحت الترابيزه اللي عليها التليفزيون من شهر
من يوم ما اختار العزله عن الناس
و عن الأشياء
و عن الدكاكين
بيدلدل م البلكونه سبت
بيجيبله سجايرُه
و ساعات شوكولاته و ...
و بس
يومها ...
مكانش مقرر إنُه يسيب البيت
كان عادي بيضحك \ و يعيط أحيانا
كان بيطلع همُه ف التليفزيون
و بنات بينطوا من التليفون
يقعدوا وياه ف سريرُه ساعات
و ساعات ع الأرض
و كان ......
بيعاتب نفسه كتير
على حب قديم
على صاحب سابُه يموت من غير ما يصالحُه
على بنت ما كملش معاها الأحلام
كان طول الليل بالشكل ده علطول
لكن يومها ......
يومها مكانش مقرر إنه يسيب البيت
بس البيت ف الآخر \ سابُه
........................................
أحمد الخدرجي .... حاجة تفرس
الأربعاء، سبتمبر 24، 2014
حاجه تفرِس
ــــــــــــــــ
فينِك من امبارح ؟
ما قابلتكيش ع الفيس
دخلت على صفحتِك
و لمحت م التهييس
حاجات تنرفزني
ضحكه بحجم البحر
غرقانه ف الكومينت
و حاجات سخيفه كدا معرفتش ابلعها
ملعون أبوها الدنيا بصراعها
ما تحني ع التفاصيل
خليها ترقص حبه ف نصوصي
خليها تضحك حبه من قلبها
دا انا من زمان نفسي انها تضحك
و باشتغل نفسي و اقول هانت
( بُكره الجميل خطوه ورا التانيه
طالع بِزَفه و ماشي قُدامنا
و اللهِ لازم تنكسف على دمها الدنيا )
عارفه بقى الشُعرا و خيالهم
حاجه تفرس
بس عارفه
بالظبط زي ما قُلتلِّك من كام قلق
( و اللهِ طعم الوهم حلو )
و انتِ بصراحه يا حبيبتي
أحلى وهم انا باعشَقُه
وهمي الجميل
اللي الحقيقه مصَدَّقاه و مصَدَقُه
و انا أحلى وهم حصل لروحك ف الحياه
إزاي بقى وهمين جُمَـال بالشكل دا
ممكن ف يوم يِتفَرَّقوا ؟!!!
..............................................
حرف الهاء ... أحمد الخدرجي
الثلاثاء، سبتمبر 30، 2014
حرف الهـاء
ــــــــــــــ
و باتنرفز
من ابتسامتها ف الكومينت
و لو علَّق و صوابعها على الكيبورد حرف الهاء
باكون مشتاق
لكن باغضب
و طول الوقت بسألني
حتبقى ازاي عيون الناس و نظراتهم لصفحتها
عشان ضحكت بصوت عالي
و كام واحد من العامَّة حيبعت ( آد )
و كام آي باد حيتكَسَّر
عشان طاير ف ضحكتها
و أحوالها و مياصتها ؟
و نتخاصم أنا و هيَّ
عتاب و زعيق لحد الصبح
زعيق يربِك ف كل الناس
على الوول كانوا أو ع الخاص
و اسيبها و اقوم و انا زعلان
و بشتم بالأدب فيها
و بادعي عليَّا و عليها بحاجات ياما
حاجات تملى من الدعوات 200 كُرَّاس
و بادعي ع الغرام كله
و على كل البنات و الفيس
و فاصل عندي ع الصفحه من التهييس
دخول ع الخاص
بنات انا عمري ف حياتي
ما بصيت يوم لرسايلهم
بَرُد عليها و اسألهُم
و بتأسف على التأخير كتير ف الرد
و حالة هيبره ع الوول
ف كومينتات بقضيها معاكسه و ضحك
عشان عارف
أكيد طبعا متابعاني
و م الغيره حتتجنن
عشان باضحك مع غيرها
زمانها بتبكي دلوقتي
و بتقزقز ف ضوافرها
و فاتحه الصفحه قدامها
و مش عايزه تعتبها
عشان لسه معاتبها
و متخاصمين
يعدي يومين
باكون فيهُم تعبت بجد
دي سايبه فراغ كبير جدا
شوارع حتى لو زحمه
باشوفها فاضيه قدامي
و مفيهاش حد
- أكلمها
لا و المصحف ما حاتكلم
و مش حاندم و لا استسلم و لا اتألم
مانش غلطان
ألاقي فجأه تليفوني بيندهلي بصوت " فيروز "
و " كيفك إنت " بسمعها
كأن الروح بتسمعها لأول مره
- وحَشِتني
باقولها لنفسي و اخطفني
و اجيب روحي من السموات
و ارَكِّبها ف بدن تاني
بدل جسمي اللي أصلا مات
ف وقت خصامنا و غيابها
و ارُد عليها وحشاني
تقول يعني سألت عليا برساله ؟
أقول أرجوكِ مش وقتُه
- وحشتيني
بتطلع منها و انت كمان بتحييني
- بلاش نعمل كدا تاني
- خلاص يا حبيبي مش حاقدر
و نحضن بعض من تاني
تعدي ليله مش أكتر
و اشوفها تاني ع الصفحه
معلق منها " حرف الهاء "
فباتنرفز
و اكون مشتاق
لكن باغضب
و طول الوقت بسألني
حتبقى ازاي عيون الناس و نظراتهم لصفحتها
عشان ضحكت بصوت عالي
......................................
الشارع لما الدكاكين بتنام.... أحمد الخدرجي
الخميس، أكتوبر 16، 2014
الشارع لما الدكاكين بتنام
ـــــــــــــــــــــــــــــــــــــ
الشارع لما الدكاكين بتنام
الشبابيك تتقَفِّل
يعني بيوت الشارع كلها بتغمض
تحتل القطط العتبات
الخرابات
الأحلام
لو قُط.. بيرمح على حلم فقير
أو واحد طول الليل قلقان
لو قطه ..
تخُش ف أحلام بنوته
ممنوع لو سهوا حتى
يخُش ف أحلام البنت دكر
ممكن ..
بيمارس ويّا القطه بتاعته بلذه غريبه
طعم الحب ف ضِل البلكونه
المرمي على الأسفلت بفعل عامود النور
و بيسمع من فاصل شيش البلكونه
بتبوح واحده بآهات المتعه
من فرط استسلامها لحد جعان
مفرود على عاج جسمها تمساح و بينهج
و موحدهُم وجد
ممكن ..
بيمارس ويّا القطه بتاعته طعم الحب
فيطلع واحد م الشباك بسجاره
عشان ما تلطوش من ابوه لو نظره بريئه
فيضطر يطَفِّيها
و لّا عشان الربو اللي مكلبش ف امه
و مفيش بخاخة صدر
فيتخضوا و يهربوا و يزوموا ف وشوش ولدين
راجعين من شُغل
فيتشائموا الولدين من صوتهم
و يحَدِفُوا بالطوب بسببهُم
كل القطط اللي بتحتل الليل
فيقوموا و يتسحبوا على شارع تاني \ مفيهوش أعداء
و يسلموا أرواحهم للخروشه ف كياس و صفايح
و ورق مليان ببواقي شعر حريمي بعد الحُمَى تقريبا ..
كان ملزوق ف سنان المشط
فخدوه مع بنسة شعر اتكسرت
مع كام حاجه على السراحه
و رموهم ف الشارع
و الشارع لما الدكاكين بتنام
للقُطط المجد
ليست هناك تعليقات:
إرسال تعليق