محمد بن - - - - أختى؟
جوز اختى قاعد على قمة شارعه بيستنى
وبيعد على صوابعه طول الايام
فوق حجر على ناصية بيتهم
وجسمه بيتاكل من فيرس سى وتليف كامل للكبد
والبرد
بقى زى التمثال منحوت من حزن
قاعد يستنى
ويصارع فى الموت
ولوحده
قاعد والكبد المهرى بتاعه يصبره ع الوقت ويمنيه
يترجاه استنى شوية
قرب ييجى الواد م الجيش
ويجيب لامه ولاخواته العيش وانا همشى معاك على طول وبكل بساطة
استنى لما ييجينى الغالى
ويفقل باب البيت ويلم اخواته من البرد
ويطبطب على امه
ياااه يا زمان
لو يستنى الموت مايجيش
يستنى الواد يمسح دمعة امه
لما هغيب
ويطبطب على اخواته صغار الريش
ويشلنى على كتفه الأخضر
يمكن اقدر اغمض عينى ساعتها
وانام بسلام
وما يفرقش الفيرس سى فى الكبد
أو فى الايام
ياخدنى لسريرى
ويسهر ويايا
واملى عيونى من لونه الأسمر
وأوصيه
يا محمد
اوعى اخواتك يا محمد
اوعى اخواتك وامك
طبطب على كتف الأرض وبوس على راسها وايدها وقلها تانى تعيش
طبطب على راسها تجيبلك نبت وعيش
اخواتك يا محمد
كتفك زاد يشبعهم ووجودك ضهرأمان
الحمل تقيل يا ضنايا عليك
ولا مهرب من قدر الله
الله الله يطول فى العمر يا ولدى
لما هترجع للبيت
هقدر انام بسلام
واسلم للرب الروح
روحى متشعبطة فيك
قلقانة
يا كتفك يا ابنى
ياما هيشيل
والحمل تقيل
خليك فاكر يا محمد
ازاى هتلقنى شهادة ربنا
وازاى تتماسك قدام اخواتك
وازاى هتحل على رباطى
وترشرش حفنة طمى على عنيا
اتماسك يا محمد وانت بتسمعنى ف سورة الملك
وخليك صابر خليك فاكر
كل وصايا القبر
وماتزعلش
ارتحت يا ولدى
يعنى كان يرضيك
كل شوية افقد وعى
وافوق اتعذب إنى ما صليتش الفجر حضور
واتعذب لما برجع دم
يرضيك يا محمد
اشوفك تبكى قصادى عليا
وانا بتقطع بالمشرط والصمت
اجمد يا محمد
أنا جيت وانت كمان خلفت يبقى مامتش
ابدا يا ابنى
اوعاك تتكعبل فى الأرض وانت شايلنى وموصلنى القبر اياك يا محمد
خبى دموعك قدام اخواتك
واحضنهم عنى وقويهم بيك
خلاص باقى يدوبك يوم
وتجينى يا غالى
ويخبط بابى واخدك ف احضانى
يمكن اشبع تشبع عينى
جانى اخويا حسين
بيقولى انك جيت
جيت قبل ميعادك
الحمد والشكر ليك يارحيم
اتسنَّد على اخويا حسين
واخرج للصالة
الاقيك ع الأرض
ملفوف بالعلم المصرى
ويغيييييب م الوعى
ويطلع م البيت نعشين
محمد ابن اختى حنان
وابوه
محمد ابن اختى حنان وابوه
كانوا يا حول الله ولا يعرفوا غير
باب الجامع
والخير والطيبة
زى الأرض تمام
محمد بن اختى حنان وابوه
.......................
قصيدة (يا سيدى)
دلوقتى
بس
مش حاسة بصداع
ولا حاسة بندالة الزمن
ولا بالادين
ساعة ما اتمدت لبدنى تمزعه
وتحظى بالقطفة السعيدة
بلا تمن
مش حاسه بصولت العيال
وصداع الشوارع
والخوف م اللى جاى
دلوقتى بس
هقدر
انام
من غير قلق
من غير اى خوف
من مشاكل
او مصايب
اوخسارات ف البشر
دلوقت بس
قدرت اسلم نفسى ليك
انت بس
امرك مطاع
فتحت جسمى ميت كتاب
وانت جيت قريتنى جد
وبهمه ونشاط
اشتهتنى
وماكانش فيه وقت لضياعه
او فراغه
اوانتظار لحظة صفا
فتحت جسمى ميت كتاب
وقعدت تقرا
ف كل حرف ف كل نقطه بحس بيك
بحس بيك على جلدى العفن
لمسة حياة
وبرده حاضن جتتى من غير ملل
من غيركلل
يدووووبك قابلت حد
حب
وبحق وحقيق
قابلت حد
يقبل كل احزانى الغلاظ
ويقبل الخوف والتعب
ويقبل العقل اللى غاب
قابلتك انت
يامشتهايا
ومشتهاك
ارمح ف جسمى
كله لك
سقطت من جسمى العناد
والتشدد
والتجمد
والحاجات النص مص
كله اتمسح لما التقاك
الفين هنا وشفا عليك
كل بالهنا
تستاهل
الجسد اللى عمره ما اترمى لحظه ف حلال
ولا حرام
تستاهل الجسد الحلال
انت
الوحيد قرتنى صح
يا سيدى
الدوود العظيم
........................................
........................................
الواد قططى
الواد المترب ده
اايوه اللي مش باينه ملامحه ده هوه
ولا لون لقميصه الوحداني
الواد اللي لما بيهجم الجوع والحاجه لسيجارة فرط
يتكور تحت الحيط
الاخراانى هناااك ف القصر
ويتغطى بالحان الفرق الدايرة ف الأقاليم
يتدفى
ويغوط ف النوم
من غير كوابييييييييس ولا شوق
الواد العاشق
كل حيطان القصر ده هوه
الواد اللي ساعات الناس بتخاف حتى تمد أديها حتى تسلم بس عليه
ويقولو عليه مجذوب ومكمكم
الواد العاشق
حافظ الحان الفرقة وكل كلام المسرح
وشتيمة المخرج لما يفيض الكيل
حافظ كل الكلمات ف النص
بالصوت والضوء والحركة
حافظ كل النغمات
ويشيل ف حاجاتهم
ونهاية الليل
لما بيتعب م اللف
ببدور على حد
يشحت منه سيجارة فرط
ولا يلاقى
يغمض عينه
ويدندن
ينكب النغم السارح فيه
ف آخر الليل
ف قلب مخازن لبس المسرح
يتغطى
بهدوم الفرقة الدايبه
ويغمض ف عنيه
فيناااااااااام بسعادة أمن
قططي
يقعد تحت الرجلين
وياشاش فضلات الفرقة وياكل
ويلم سبارس
وبنظرة عجييبه عجيبه
تغرق جوه عنيه ولا بيكاسو
ولوركا لما بيتعب م التفكير ف قضايا العالم
ويشد ف عقب سيجارة ف ايده
بيبان كأنه يفكر ف الملكوت
والجسم تابوت
بيكتف جناحات أفكاره الضخمة الفخمة
ويغيييييييييب م الوعي
يقولو عليه مجذوب
يسحب ف الدخان ويغمض عينه ببطء شديد
ويروح حاطط رجل ما فوق التانيه
ويشد ف سيجارته الفرط
وآنا لما بعدى عليه بيقولى
آنا لو يوم مره ماجتش القصر؟
القصر يموت
ولا هتلاقى لاضوء ولاصوت
كل القصر ده هوه ما فوق كتافى
لو يوم غفلت القصر يموت
أسيبه
واقعدمن بعد أراقبه
جنب الحيطة
آخر حيطة ف حيطان القصر
ينام ويغوط ف النوم
ويدندن طول ما هو نايم
قططي يا احنا بشكل جميل
من غير مكاييج ولا لون
آنا عايزة اعد أدور عن كل حيطان القصر ف كل سكك وحواري ودرب
قططية كتيييير ع العد
قططية لحن ماسمعوش حد
ليست هناك تعليقات:
إرسال تعليق